македонски

Општински избори во октомври 202

Општински избори во октомври 2020

Општинските избори ќе се одржат во октомври. Ќе добиете избирачки комплет за да гласате од дома. 

Избори нема да се одржат за општинските совети на Casey City, South Gippsland Shire и Whittlesea City. Избирачите во овие три општини не треба да гласаат.

За да можат да гласаат, избирачите мора да бидат регистрирани до 4 часот попладне во петок, 28 август. Гласачкиот комплет ќе им биде пратен на избирачите по пошта меѓу 6 и 8 октомври 2020.

Пополнете го вашето гласачко ливче и вратете го што е можно поскоро пред затворањето на гласањето во 6 часот навечер во петок, 23 октомври.

Кој може да се регистрира за гласање?

За гласање на општинските изборите постојат два вида на регистрирање: регистрирање во државата (state-enrolled) и регистрирање во општината (council-enrolled).

Избирачи регистрирани во државата

Ако сте во државниот избирачки список (state electoral roll), ќе бидете автоматски регистрирани за општинските избори во октомври.

За да бидете во државниот избирачки список, мора да сте австралиски државјанин, да имате 18 или повеќе години на денот на изборите (сабота, 24 октомври 2020) и да сте живееле во Викторија најмалку еден месец. 

Ако сте австралиски државјанин и сакате да проверите дали сте во државниот избирачки список, можете да го направите тоа преку „Провери ја мојата регистрација“ (Check My Enrolment) на оваа интернет-страница или јавете нѝ се на 131 832. Ако ви треба преведувач, јавете нѝ се на 03 9209 0105.

Ако сте австралиски државјанин и имате 18 или повеќе години, може да побарате да се регистрирате преку интернет со користење на образецот за регистрирање преведен на македонски јазик, што се наоѓа подолу на оваа страница. Образецот треба да го пополните на англиски и кога ќе го отпечатите, тој ќе биде на англиски. Потпишете го образецот и пратете го на адреса:

Victorian Electoral Commission
Reply Paid 66506
Melbourne Vic 8001

Тоа е бесплатна услуга и не ви треба поштенска марка.

Ако сте во гласачкиот список, но сте се преселиле или сте го промениле името, но сеуште не сте ги ажурирале податоците во гласачкиот список, можете да го направите тоа во образецот за регистрација што се наоѓа подолу на оваа страница.

Ажурирањето на податоците и нови регистрирања мора да се извршат до 4 часот попладне во петок, 28 август 2020.

Ако сакате да добиете бесплатна текстуална порака VoterAlert или имејл за да ве потсети за гласањето, во вашиот образец за регистрација вклучете го бројот на вашиот мобилен телефон или имејл адресата.

Избирачи регистрирани во општина

Избирачите регистрирани во општинските списоци (council-enrolled voters) мора да имаат 18 или повеќе години на денот на изборите (сабота, 24 октомври 2020) и да не бидат избирачи регистрирани во државниот избирачки список во рамките на општината.

Ако сте биле регистрирани во општинскиот избирачки список на последните општински избори за имот што го поседувате во друга општина, а не во која живеете, избирачкиот комплет за тој имот ќе ви биде пратен автоматски во октомври.

Ако не сте австралиски државјанин, но:

  • живеете и плаќате општински давачки (rates) за имот, или
  • плаќате општински давачки (rates) за имот што го користите (на пример, за изнајмен дуќан) на територијата на општината, но немате какво било друго гласачко право, или
  • поседувате имот во општината во која не живеете, но не бевте на гласачкиот список на последните општински избори,

може да поднесете барање до општината да гласате на општинските избори. Треба да стапите во контакт со вашата општина за да добиете образец за регистрација или да проверите дали сте избирач регистриран во општинскиот избирачки список (council-enrolled voter).

Како се гласа на општинските избори?

Меѓу 6 и 8 октомври по пошта ќе ви биде пратен избирачки комплет.

Во избирачкиот комплет ќе најдете:

  • гласачко ливче заедно со изјави и фотографии на кандидатите
  • упатства за гласање (со преводи)
  • плик за гласачкото ливче со капак
  • плик со платена поштарина.

Како да гласате

  • впишете ја бројката 1 во полето до лицето кое сакате да победи
  • впишете 2 во полето до лицето за кое гласате второ
  • продолжете да внесувате бројки додека не ги пополните сите полиња
  • користете само бројки.

Општината Melbourne City има специјални правила за гласање. Ако сте на општинскиот избирачки список за Melbourne City, ќе добиете две гласачки ливчиња.

На помалото гласачко ливче, за да го изберете Раководниот тим (Leadership Team), мора да внесете бројки во сите полиња по редослед по ваш избор.

Поголемото ливче е за избор на членови на општинскиот совет - советници (councillors) Можете да гласате со внесување на бројката „1“ над линијата за групата советници кои сакате да бидат избрани

ИЛИ

може да внесете бројки во полињата под линијата за поединечни советници. Ако гласате под линијата, мора да внесете бројки во сите полиња под линијата по редослед по ваш избор.

Што ќе се случи откако ќе го пополнам гласачкото ливче/ливчиња?

  1. Пополнетото гласачко ливче/ливчиња ставете го во приложениот плик (тој со капак) и залепете го.
  2. Напишете ги вашите податоци на капакот на пликот за гласачки ливчиња.
  3. Затворениот плик за гласачки ливчиња ставете го во пликот со платена поштарина и пратете го по пошта.

Пратете го вашето гласачко ливче по пошта што е можно поскоро пред затворањето на гласањето во 6 часот навечер во петок, 23 октомври.

Кандидирање за членови на општински совет

Ако сакате да се кандидирате на изборите во октомври, треба да ги разбирате правилата. Ако ви требаат повеќе информации за тоа, јавете се на 131 832 или преку преведувачката линија за македонски јазик на 03 9209 0105.

Работа на изборите

Викториската изборна комисија (VEC) сака да вработи луѓе од сите јазични заедници за работа на изборите. Ако сте заинтересирани, ве молиме регистрирајте се на англиски на: https://appointments.vec.vic.gov.au/

Не можеме да гарантираме дека ќе ви биде понудена работа - се земаат предвид многу нешта како, на пример, во кои области или активности е потребна помош. На државните избори нѝ требаат многу повеќе луѓе. За овие општински избори не нѝ требаат толку луѓе, бидејќи станува збор за поштенско гласање.

Дали гласањето е задолжително?

Гласањето е задолжително за австралиските државјани регистрирани за избори и за сите избирачи регистрирани за изборите за општинскиот совет на Melbourne City.

Гласањето не е задолжително ако сте гласач регистриран во општина (council-enrolled voter).

Безбедни избори

Подготвуваме план со кој ќе обезбедиме гласачите, лицата кои се номинираат и персоналот на VEC да бидат безбедни од коронавирусот (КОВИД-19). Во сите канцеларии ќе се спроведуваат строги мерки за хигиена и социјално растојание.

Што ќе се случи ако заборавам да гласам?

Ќе добиете писмо со кое ќе ви биде побарано објаснение. Ве молиме пополнете го образецот во писмото, за да нѝ ја разјасните причината поради која не гласавте. Ако немате сериозна причина што не сте гласале, може да бидете парично казнети.

Прашања?

Ако имате какви било прашања за овие информации и ако сакате да разговарате со нас со преведувач, ве молиме јавете се на 03 9209 0105.

Како да се запишам

Пополнете формулар за запишување на англиски јазик (PDF, 1.4MB)

Формуларот за запишување може да се прочита на јазикот на кој што ќе го преземете, но ќе се печати на англиски јазик. При пополнување на формуларот мора да пишувате на англиски јазик.